இந்த புகைப்படத்தின் விளக்கம்

 

இந்த புகைப்படம் என்னவென்று யாராவது சொல்லுங்களேன்!!!

இந்த புகைப்படம் வித்தியாசமாக இருக்கிறதே, இதனை நம் வலைப்பூவில் பகிர்ந்துக்கொண்டு நண்பர்களின் கருத்தை அறியலாமா என்று எண்ணினேன். அந்த எண்ணத்திற்கு பக்கபலமாக இருந்தது “எங்கள் பிளாக்” வலைத்தளம் தான். எங்கள் பிளாக்கின் நண்பர்கள் எப்படித்தான் தேடித் தேடி வித்தியாசமான புகைப்படங்களை நம் பார்வைக்கு பகிர்கிறார்களோ என்று தெரியவில்லை.  ஞாயிறு 280. கனவு

அவர்களின் பாணியில் இந்த புகைப்படத்தை பகிர்ந்தேன். நீங்கள் எல்லோரும் ஆர்வமாக பின்னூட்டத்தில் உங்களுக்கு தோன்றியதை எழுதியமைக்கு முதலில் என்னுடைய மனமார்ந்த நன்றிகளை தெரிவித்துக்கொள்கிறேன். நிறைய பேர் அது என் குழந்தையின் நிழல் என்று சொல்லியிருந்தீர்கள். அது முற்றிலும் சரி. ஆனால் அந்தப் புகைப்படத்தை நாங்கள் யாரும் எடுக்கவில்லை. அந்த குழந்தையே தன்னுடைய நிழழை படம் பிடித்திருக்கிறது. அவர் எங்களின் இரண்டாவது மகாராணியான இனியா தான்.

 

சென்ற சனிக்கிழமை தான், எங்கள் தமிழ் பள்ளியின், இந்த ஆண்டுக்கான கடைசி வாரம். பொதுவாக நான் வகுப்பு  எடுக்க போய்விடுவேன். ஓவியா அவருடைய வகுப்பிற்கு சென்று விடுவார். இனியாவிற்கு மூன்று வயது சென்ற ஜூன் மாதத்தில் தான் முடிவடைந்திருப்பதால், அவரை அடுத்த வருடம் தமிழ் பள்ளியில் சேர்த்து விடலாம் என்றிருக்கிறோம்.  அதனால் அம்மணி இனியாவை வகுப்புக்கு வெளியில் வைத்துக்கொண்டிருப்பார்கள். அவர்களும்  இடைவேளை நேரத்தில், படித்து களைத்து வரும் குழந்தைகளுக்கு சிற்றுண்டிகளை (snacks, juices) வழங்குவதில் ஈடுபட்டிருப்பார்கள். சென்ற வாரம் அம்மணிக்கு தலைவலி, முதலில் பள்ளிக்கு வரவில்லை என்று சொன்னவர்கள், பின் அது கடைசி வாரம் என்பதால் வந்தார்கள். இனியாவோ, அவர்களுக்கு ஓய்வை கொடுக்காமல் அவர்களின் பொறுமையை சோதித்துக்கொண்டிருந்தார். அதனால் நான் வேறு வழியில்லாமல் என்னுடைய அலைபேசியை இனியாவிடம் கொடுத்துவிட்டு அம்மாவை தொந்தரவு செய்யாதே என்று சொல்லி வகுப்புக்குச் சென்று விட்டேன். என்னுடைய அலைபேசியில் விளையாட்டுக்கள் அதிகம் இருக்காது. அவர்களுக்கு தேவையான ஆங்கிலம்,தமிழ் கற்றுக் கொள்வது,பெயிண்ட் செய்வது போன்றவைகள் தான் அதிகம் இருக்கும். ஓவியாவிற்கு இவைகளே போதும், ஆனால் இனியாவிற்கு இவைகள் சீக்கிரம் போரடித்து விடுவதால், அவர் காமிரா பக்கம் சென்று சகட்டுமேனிக்கு படங்களாக சுட்டுத்தள்ளுவார். பிறகு ஒவ்வொரு முறையும் அவரிடமிருந்து அலைபேசியை வாங்கியபின் தேவை இல்லாத படங்களை அழிப்பதே எனக்கு பெரிய வேலையாக இருக்கும். இந்த மாதிரித்தான் அன்றைக்கும் அவருடைய நிழழையே படம் பிடித்திருக்கிறார். நான் வீட்டிற்கு வந்து என்னுடைய அலைபேசியில் தேவை இல்லாத படங்களை எல்லாம் நீக்கிக்கொண்டு வரும்போது, இந்த புகைப்படம் கண்ணில் பட்டது. முதலில் எனக்கு ஒன்றும் புரியவில்லை. பிறகு தான் தெரிந்தது, தன்னுடைய நிழழையே படம் பிடித்திருக்கிறார் என்று.

 

அன்றைக்கு அவர் சுடிதார் அணிந்து, தலையில் இந்த பிங்க் நிற முயல் தலைமுடி நாடாவை (bunny hair band) வைத்திருந்தார். அது தான் அந்த புகைப்படத்தில் ஒரு வித்தியாசத்தை கொடுத்திருக்கிறது.

 

சில நேரங்களில் குழந்தைகள் செய்கின்ற குறும்புகள், நம்மை ஈர்த்துவிடுகின்றன.