ஆணின் தோல்விக்கு பின்னால் பெண் இருக்கிறாள்

                (பட உதவி - கூகிள் ஆண்டவர்)

ஒவ்வொரு ஆணின் வெற்றிக்கு பின்னால், ஒரு பெண் இருக்கிறாள் என்று சொல்லுவார்கள். வாழ்க்கையில் ஒரு ஆண் வெற்றி பெறும்போது, அதில் அவனுடைய மனைவியின் பங்களிப்பானது மிக முக்கியமாக இருக்கும். அது போல் வேலையிலோ அல்லது வியாபாரத்திலோ வெற்றி பெற்ற ஒரு பெண், தன்னுடைய இந்த வெற்றிக்கு தன்னுடைய கணவர் தான் காரணம் என்று கூறுவார். இவ்வாறு, ஒரு ஆணுடைய வெற்றிக்கு பெண்ணும், பெண்ணுடைய வெற்றிக்கு ஒரு ஆணும் காரணக்கர்தாவாக இருக்கிறார்கள்.

கடந்த சில நாட்களுக்கு முன்பு நான் படித்த ஒரு செய்தியோ, பெண்களால் தான் ஆண்கள் தோற்று போகிறார்கள் என்று கூறியது. அந்த ஆண்களின் தோல்வி வாழ்க்கையில் இல்லை, விளையாட்டில். அதுவும் இந்தியாவில், மிக மிக பணக்கார விளையாட்டான கிரிக்கெட்டில் தான். நம் ஆட்கள் இங்கிலாந்துடனான டெஸ்ட் போட்டியில் தோல்வி அடைந்ததற்கு, அவர்களது மனைவியரும், தோழியரும் தான் காரணம் என்று இந்திய கிரிக்கெட் வாரியம் சொல்லியிருக்கிறது. நம்மவர்கள் விளையாடி தோற்றதற்கு, எப்படி அவர்களது மனைவியர் காரணமாவர்கள் என்று நீங்கள் ரொம்ப யோசிக்க வேண்டாம். காரணம் இது தான், கிரிக்கெட் வாரியம், வீரர்களோடு அவர்களது மனைவியைரையும், தோழியரையும் இங்கிலாந்து செல்ல அனுமதித்திருந்தது. வீரர்களை, பயிற்சிக்கு அனுப்பாமல், அவர்களை தங்களோடு ஊர் சுற்றவும், ஷாப்பிங் செய்யவும் அவர்களுடைய மனைவியர் கூட்டிக்கொண்டு சென்று உள்ளார்கள். மேலும், வீரர்கள் விளையாட நினைத்தாலும், அவர்களை விளையாட முடியாதபடி, குழப்பி, திசை திருப்பி விட்டார்கள் என்று வீரர்களின் தோல்விக்கு அலசி ஆராய்ந்து காரணம் சொல்லியிருக்கிறது, இந்திய கிரிக்கெட் வாரியம்.

இதுவே, இந்தியா இந்த இங்கிலாந்து தொடரை முழுமையாக கைப்பற்றியிருந்தால், இந்த முழு வெற்றிக்கும், வீரர்களோடு சென்ற அவர்களது மனைவிய\ரும்,தோழியரும் தான் காரணம் என்று கிரிக்கெட் வாரியம் கண்டிப்பாக சொல்லியிருக்கும். வாரியம் சொல்ல வில்லையென்றாலும் கூட, நம் வீரர்கள் கண்டிப்பாக சொல்லியிருப்பார்கள். ஆக மொத்தத்தில், இவர்களின் வெற்றி தோல்வி காரணங்களுக்கு ஒரு பெண் தான் தேவைப்படுகிறாளே ஒழிய விளையாட்டுத்திறன் இல்லை என்று நினைக்கும்போது, இந்த பாழாய்ப்போன கிரிக்கெட்டை நம்பி இன்னும் நம் நாட்டில் பைத்தியங்கள் உலவுகிறதே என்று மனது வேதனையடைகிறது.   

பின்குறிப்பு – அடியேனுடைய கட்டுரை படைப்பும், நாடகமும் மிகவும் சிறப்பாக நடந்தேறியது. அதனைப்பற்றிய பதிவுகள் விரைவில் .....